‘‘อฏฺฐเหตูหิ สมฺผุสฺส [อฏฺฐเหตูหิ สมฺผสฺส (สฺยา. ปี.), อตฺถเหตุ นิสํสยํ (ก.)], วสุธายํ ปกมฺปติ;

ตถา นิมิตฺตา ทิสฺสนฺติ, โอภาโส วิปุโล มหาฯ

[67]

‘‘อสํสยํ พุทฺธเสฏฺโฐ, อุปฺปชฺชิสฺสติ จกฺขุมา;

สญฺญาเปตฺวาน ชนตํ, ปญฺจสีเล กเถสหํฯ

[68]

‘‘สุตฺวาน ปญฺจ สีลานิ, พุทฺธุปฺปาทญฺจ ทุลฺลภํ;

อุพฺเพคชาตา สุมนา, ตุฏฺฐหฏฺฐา อหํสุ เตฯ

[69]

‘‘ทฺเวนวุเต อิโต กปฺเป, ยํ นิมิตฺตํ วิยากริํ;

ทุคฺคติํ นาภิชานามิ, พฺยากรณสฺสิทํ ผลํฯ

[70]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[71]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[72]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา นิมิตฺตพฺยากรณิโย เถโร อิมา

คาถาโย อภาสิตฺถาติฯ

นิมิตฺตพฺยากรณิยตฺเถรสฺสาปทานํ ทสมํฯ

สาลกุสุมิยวคฺโค สตฺตจตฺตาลีสโมฯ

ตสฺสุทฺทานํ –

สาลกุสุมิโย เถโร, ปูชา นิพฺพาปโกปิ จ;

เสตุโท ตาลวณฺฏี จ, อวฏลพุชปฺปโทฯ

ปิลกฺขปฏิภานี จ, เวยฺยากรณิโย ทิโช;

ทฺเวสตฺตติ จ คาถาโย, คณิตาโย วิภาวิภิฯ

48. นฬมาลิวคฺโค